now now

شركتك هتقفل إمتى؟

 

الـBusiness بتاعك هينتهي إمتي؟
ولا مش هينتهي؟
يعني إنت لما تعمل شركتك أو الـStart Up بتاعك،، هتفضل مكمل لغاية إمتي؟
هتخسر قد إية و هتكسب قد إية؟

كل دي أسئلة أكيد بتيجي في بال كل الناس اللي ناوية تعمل الـBusiness الخاص بيها، سواء كان في دماغك إنك تبدأ دة دلوقتي أو بعدين، إنت لازم جداً تعرف حاجة إسمها الـLife Cycle.
دي من المعلومات اللي لازم تكون عندك سواء كنت Developer أو Entrepreneur أو طالب او أياً كان 😀

الـLife Cycle بتاعت أي شركة أو منتج بتتكون من 4 مراحل .. من أول ما بتبدأ و لغاية ما بتنتهي.

أول مرحلة و هي مرحلة الـIntroduction، و دي المرحلة اللي بتبدأ تعلن فيها عن شركتك للناس .. لو كنت فاكر إنك هتكسب في مرحلة الـIntroduction تبقي غلطان 😀 في المرحلة دي حتي و إنت بتبيع المنتج أو الخدمة بتاعتك إنت برضوا بتخسر ! 😀

طيب لية بقي؟ لأن ببساطة جداً إنت الـCost بتاعتك بتكون أكبر من الـProfit .. لأن في البداية إنت لسة بتبدأ تصرف عشان تظبط مكتبك .. عشان تبدأ تدفع مرتبات الـTeam بتاعك .. و بتبدأ تشتري Material تعمل بيها إنتاجك و تدفع فلوس لإعلانات عن المنتج بتاعك و هكذا .. في لو مثلاً الـTotal Cost بتاعتك 10,000 و أول مكسب يجيلك هو 1,000 ، إنت لسة خسران 9,000 !
الشهر اللي بعدو كسبت 2,000 .. إنت برضوا لسة خسران 7,000 ..

هتبدأ تكسب، أول ما توصل للـBreak even Point (دي حاجة ممكن نتكلم عنها بعدين) و هي إنك تبدأ تغطي الـCost بتاعتك كلها بقي و تبدأ تدخل Profit.

و دي أول Stage و اللي اسمها Introduction ..

بعدها هتيجي مرحلة الـGrowth بقي .. إنت نزلت السوق، الناس بدأت تسمع عنك، بدأت تشتري منك، بدأت تغطي كل التكاليف، بدأت تعمل ربح كويس، إسمك بدأ يتعرف في السوق ..
و هي دي بقي مرحلة الـGrowth .. الـBusiness بتاعك بيبدأ ينموا في السوق.

و هنا هتيجي مرحلة الـMaturity بقي و هي النضج … و دي حاجة بتاخد وقت كتير عشان توصلها و أصعب مرحلة في كل المراحل بالرغم من إنك بيدخلك في المرحلة دي أكبر عائد و بيكون عندك أكبر Market share و أكبر عدد من الـCustomers و هكذا..

طيب لية بقي دي أصعب مرحلة؟
عشان ببساطة إنت لازم تعمل أقصي مجهود عندك عشان تحافظ إنك تفضل في المرحلة دي أكبر وقت ممكن..
بتبدأ تعمل إعلانات و تطور كتير من المنتج بتاعك و تستخدم كل وسائل الـPromotion عشان تقدر تكسب الحرب اللي بينك و بين المنافسين (ايوا اه حرب :D) .. طيب لو معملتش كدة إية هيحصل؟

ببساطة هتلاقي نفسك في الـDeclining Stage و اللي هي أخر مرحلة .. و اللي فيها كل حاجة بتقل .. وجودك في السوق بيقل، مبيعاتك بتقل، الـMarket share بتاعك بيقل، الطلب عليك في السوق بيقل!
بتبدأ تنتهي! و دي حاجة طبيعية جداً،
شطارتك في حاجة واحدة، و هي إنك تفضل قاعد أكبر وقت ممكن في مرحلة الـMaturity لأنها أحسن مرحلة بالنسبة لأي حاجة :)

و دي بقي الـLife Cycle لأي حاجة،، السؤال حالياً و اللي لازم تجاوبوه 😀
لو إنت في الـDeclining Stage و البراند بتاعتك بدأت تقع .. إية الحلول اللي هتستخدمها؟

#علموهم_يتعلموا

 

انشر تعليقك