لو عندك مشروع_website size

لو عندك مشروع ..

شركتك، مشروعك، فكرتك، أي حاجة من الحاجات دي بتبقي واقف فيها عند نقطة معينة، و محتاج تفهم إية الفوائد اللي ممكن تاخدها و إنت واقف عند النقطة دي، أو إية القرارات اللي المفروض تقررها و إنت عند النقطة دي، او اصلاً النقطة اللي إنت واقف عندها دي سلبية ولا إيجابية؟

في الوقت دة بقي لازم تجيب ورقة و قلم و تقسم الورقة دي لـ 4 أجزاء .. و تعالى شوف هتكتب إية في كل جزء عشان تعرف تحدد موقفك من النقطة اللي واقف عندها ..

الجزء الأول، و هو جزء نقاط القوة الداخلية:
في الجزء دة بتبدأ إن و الفريق بتاعك، إنكم تحللوا و تعرفوا إية هي نقاط القوة “الداخلية” اللي عندكم، يعني مثلاً .. لو التيم بتاعك تيم قوي، في دي تعتبر نقطة قوة داخلية..نقطة قوة لأنها شئ إيجابي، و داخلية لأنها جوة شركتك و تحت سيطرتك!
و مثلاً لو شركتم مكانها كويس “It’s Location” ، يعني مكان إستراتيجي، لية سمعة كويسة و الزباين بتجلكم بسهولة، دي برضوا نقطة إيجابية، و داخلية لأن “المكان” دة شئ تحت سيطرتك، ممكن تغيرها في أي لحظة!

في الجزء دة هتطلب من كل شخص في الـTeam انه يفكر في نقاط القوة الداخلية عنده، و اللي بنسميها بشكل علمي Strengths Points .. في النهاية هتبدأ تجمع كل النقاط من كل الـTeam و تتناقشوا فيها، و تكتبوا النقاط النهائية .

الـAction المطلوب:
بعد ما طلعت كل نقاط القوة، المطلوب منك حالياً دعمها، تقويتها، تعزيزها، يعني لو الـTeam بتاعك كويس و دي نقطة قوة و ليها عائد على الشركة، يبقي حاول تقوي النقطة دي أكتر، عن طريق تدريبات ليهم، إعرف إية بيحفزهم و كتر منه و هكذا ..

لأن الطبيعي في اللحظة دي إن العائد هيزيد و أكيد دة هدفك .

12179062_10208076337014706_1684899349_n

الجزء التاني، جزء نقاط الضعف الداخلية :
يعني ببساطة لو فهمت الجزء الأول،هيبقي سهل عليك تعمل الجزء التاني ..
-فالنفترض مثلاً إن الجزء الخاص بالـFinance في شركتك واقع أو عندك مشاكل مالية .. بالتالي يبقي دي نقطة “بتضعف” الاداء بتاع شركتك .. و كذلك برضوا لو التيم بتاعك ضعيف أو مش مؤهل كفاية،

بعد ما بتكتب كل النقط دي إنت و التيم بتاعك، بيبقي قدامك شكل واضح جداً و مكتوب للموقف الداخلي في شركتك،
يعني عرفت إية نقاط القوة اللي بتساعد في تحسين الاداء في شركتك، و عرفت إية نقط الضعف اللي تحت سيطرتك اللي بتقلل من مستوي اداء شركتك ..

الـAction المطلوب:
في نقاط الضعف الداخيلة بيكون مطلوب منك إنك تعمل Elimination “إزالة”، مطلوب منك على قد ما تقدر إنك تتخلص من كل نقاط الضعف عندك، تبدأ تحاول تصلح موقفك المالي، و تبدأ تعين ناس أكتر كفاءة، و بشكل عام تبدأ تحول كل نقاط ضعفك دي لنقاط قوة.
11758970_10208076336614696_31200097_n

الجزء التالت، و هو جزء الفرص المتاحة الخارجية:
الكلمة اللي إتغيرت في العنوان هنا هي كلمة “خارجية” ، في الجزء دة الموضوع بيكون مختلف الى حدٍ ما..
في الجزء التالت و الرابع من الورقة بنبدأ نركز مع البيئة الخارجية للشركة، يعني إية الفرص اللي برة الشركة اللي ممكن تحسن من اداء الشركة؟

تعالوا نفترض مثلاً إن إنت شركة متخصصة في تطوير الـMobile Applications و أكبر منافس ليك في السوق حصلتله أزمة مالية و وقع بشكل مؤقت! في الـBusiness الموقف دة فرصة كبيرة لشركتك! عارف لما يكون اللاعب مع الكورة و عدى خط الـ18 و فجأة الـGoal Keeper وقع!
تفتكروا دي فرصه لمين ؟ 😀 نفس الموقف بقي، الشركة المنافسة ليك وقعت بشكل مؤقت، يا اما هتلحق و تجيب جون، أو هتتعامل عادي و هتعدي الفرصة و هتبقي ساعتها خسرت!

دة الجزء الخاص بالحاجات دي .. جزء الـOpportunities “الفرص” ..
الفرص الخارجية اللي مش تحت سيطرتك، سعر الدولار نزل، قانون جديد ظهر، سعر إيجار المكاتب نزل، من الأخر اي فرصة خارجية ممكن تبقي السبب في إستغلالها و تحسين اداء شركتك ..

الـAction المطلوب:
كتابة كل الفرص الخارجية المتاحة و اللي هتساعدك في تحسين اداء شركتك، و إستغلالها في إنك تستخدمها عشان تقوي بيها الـStrength و تمحي بيها الـWeaknesses .
12200469_10208076336214686_2124073839_n

الجزء الرابع و الأخير، و هو جزء التهديدات الخارجية:
في الجزء دة بنكتب كل عنصر من العناصر الخارجية و اللي بيمثل “تهديد” علي اداء شركتي .. يعني أنا مثلاً شركة Ice Cream و مجهز نفسي إني هنزل بحملة عن الحر و إرتفاع درجات الحرارة عشان أزود مبيعات المنتج بتاعي .. بس فجأة الأرصاد الجوية أعلنت عن وجود أمطار غزيرة!!
دة أكيد تهديد خارجي حصل بدون أي تدخل مني، و بقي مطلوب مني إني أكون واعي بكل التهديدات دي،
من ضمن التهديدات ممكن تكون إن المنافس بتاعك بيزود حصته من السوق، و في كل الأحوال، لازم إنك تبقي واعي و فاهم جداً كل العوامل الخارجية اللي بتمثل تهديد علي اداء شركتك ..

الـAction المطلوب:
في الجزء دة إنت هتحاول تستخدم الـOpportunities اللي في الجزء التالت في إنك تحل بيها التهديدات .. أو إنك تبدأ تطلع أفكار يكون الهدف منها هو تقليل تأثير التهديدات الخارجية علي اداء شركتك ..

804681_10208076335854677_382397746_n

في النهاية الـ4 أجزاء اللي في إيدك دول .. إسمهم الـSWOT Analysis و هي نوع من أنواع التحليلات المهمة جداً لأي شركة أو مشروع، ولازم تعملها لما تكون محتاج تاخد قرارات او اثناء كتابتك للـBusiness Plan أو الـMarketing Plan .. دي غير إن الـSWOT analysis كل رجال الأعمال و الـEntrepreneurs و الـManagers و أي حد في الـBusiness Field لازم جداً يكون على دراية بيها :)

 

و اللي مطلوب منك في النهاية إنك …

12188504_10208076335734674_232119064_n

انشر تعليقك