Untitled-4

يعني إيه Big Data؟


سمعنا كتير في الفترة الأخيرة عن مصطلح Big Data وعن أهميته في الوقت الحالى وكمان الشركات اللى بدأت تستخدم البيانات الضخمة أفضل استخدام ممكن.
حجم البيانات في عالمنا الحالي ضخم جدا ومعقد ولذلك من الصعب على برامج وأدوات معالجة البيانات التقليدية التعامل مع هذه الكم من البيانات .بيانات كتيرة جدا مالهاش علاقة ببعض تخيل معايا لو انت دخلت على موقع جوجل وعملت بحث على منتج معين وبعدين دخلت على تويتر كتبت تويتة وفتحت الفيس بوك عملت Review على صفحة ما واستخدمت Forequre علشان تقول إنك في مكان ما , كل دي تعتبر بيانات , والنوع ده من البيانات من الصعب على البرامج التقليدية التعامل معاه والحصول على معلومات مفيدة منه .وعلشان كده ظهر مصطلح ال Big Data واللى عن طريق كمية البيانات الكتيرة اللى موجوده على الإنترنت بيتم تحليلها ببرامج وأدوات مختلفة علشان ناخود منها معلومات مفيدة تقدر تفيدنا في اتخاذ قرارت معينة .

مين ممكن يستفيد من ال Big Data ؟

لو اتكلمنا على المستوى التجاري فكل الشركات ممكن تستفيد منها , فمثلا شركة زي أمازون تقدر عن طريق تحليل بيانات مستخدمي الإنترنت تقدر تعرف سلوك المستهلكين وإيه المنتجات اللى هما مهتمين بيها وإيه القرارت الشرائية اللى ممكن ياخدوها , وبناءا عليه هيقدروا يوجهوا الإعلان المناسب للشخص المناسب .

وهنا ممكن حد يتسائل يعني هما بيراقبوني على الإنترنت ؟

احنا ممكن نبص للموضوع بشكل تاني , إنهم بيحللوا البيانات الخاصة بيك وسلوكك على الإنترنت علشان يوصلوا ليك الإعلان اللى انت مهتم بيه فعلا , يعني الشركة هتبعتلك إعلان لمنتج إنت فعلا مهتم بيه وممكن تشتريه على عكس إعلان التليفزيون مثلا اللى انت مجبر تتفرج عليه سواء انت مهتم بيه أو لا , فالمصلحة هنا متبادلة .

كمان في شركه جوجل واللى عندها كم هائل من المعلومات واللى طبعا بتقدر تستخدمها في الحصول على معلومات بتفيدها في تطوير منتجاتها المختلفة ,وأحد منتجات جوجل هو Think With Google واللى شركة جوجل بتقدموا للمسوقين واللى من خلاله بيقدروا يعرفوا سلوك المستهلكين في بلد معين واللى بناءا على السلوك ده هيقدر المسوق ياخود قرارت سليمة ,وفي وغيرها كتير من المنتجات .

هل الموضوع ربحي فقط ولا أقدر أستخدمة في أغراض غير ربحية ؟

طبعا تقدر تستخدمة في أغراض غير ربحية , زي الحملات الانتخابية , واللى من خلال البيانات الخاصة بالناخبين تقدر تحلل البيانات دي وتطلع منها بمعلومات عن اهتماماتهم سواء الناخب مهتم بالصحه مثلا فاتبعتله إعلان من حملتك الإنتخابية في الجزأ الخاص بالصحة أو ناخب عنده أطفال في مراحل تعليمية فا ده هيكون مهتم بالتعليم فا هنستهدفه بإعلان خاص بالتعليم وهكذا .

وأحد البرامج الأشهر اللى بتقوم بتحليل هذا الكم الهائل من البيانات هو برنامج Apache Hadoop وهو Open Source وبتستخدمة العديد من الشركات الكبيرة في تحليل البيانات الخاصة بيها , شركات زي Google و Amazon و Ebay و IBM .

إيه المعلومات اللى تعرفوها عن ال Big Data ؟

 

 

انشر تعليقك